ROXAS CITY – Ginpahamatang sa karon sa isolation facility sa Capiz Rehabilitation Center (CRC) ang duha ka mga Person Deprived of Liberty (PDL) matapos nga nagpositibo sa balatian nga Tuberculosis (TB).
Ini ang ginkumpirmar ni Provincial Jail Warden Arjuna Yngcong, sang mainterview sang Bombo Radyo.
Suno diri, ginpaidalom ang masobra sa 300 ka mga PDL’s sa medical kag dental check-up nga ginpatigayon sang Provincial government, sang Agosto 4, sini nga tuig.
Sandig sa datos sang Capiz Provincial Health Office, may 363 ka mga PDL’s ang natigayon nga matsekyar, kun sa diin 210 diri ang naka-avail sang medical check-up, 98 ang sa dental check-up kag 55 ang ginpaidalom sa sputum test, kag duha diri ang nagpositibo sa TB.
Dugang pa ni Yngcong nga sa maayo nga kahimtangan ang duha ka mga may TB, libre man suno diri ang pagpabulong sa balatian nnga TB, kag wala nagapabaya ang tagdumalahan sang CRC sa pagmonitor sa ikaayong lawas sang mga preso.
Sa pihak nga bahin, ginpahayag ni Yngcong nga wala sang reklamo ang mga PDL’s sa ila pagkaon, bangud nagakaon ang mga ini sang maayo nga sud-an kaangay sang isda kag utan, apisar nga ang ila pondo sa kada inmate ang may kantidad nga P55 kada adlaw.
