Nagpahayag sang tuman nga ka akig kag pagkondena ang Partido Demokratiko Pilipino Lakas ng Bayan (PDP Laban) sa ginapahayag pagsako kag mapang-imbabaw nga impeachment sang Kamara de Representantes kay Vice President Sara Duterte nga nakabaton sang 32.2-M nga boto sadtong 2022 elections kung sa diin ginakabig ‘most-voted candidate’ sa kasaysayan sang Pilipinas.
Sa isa ka statement, ginsiling sang partido nga ginapamunuan sang amay ni VP Sara nga si anay Pangulong Rodrigo Duterte nga isa ini ka lantaran nga pagpakita sang mahigko nga pulitika, pagtamay sa sovereign will sang Pilipino kag wala sang untat nga pag-abuso sang gahum.
Klaro suno diri nga ginsako ang impeachment batuk sa Bise Presidente nga ginpatigayon sang mga desperado nga mga miyembro sang Manubo nga Panalgan sang Kongreso agud ipatalang nagikan sa nagalala nga sitwasyon sang pungsod.
Subong man agud waskon ang tiyansa ni VP Sara nga magpapili sa mas mataas nga posisyon sa 2028 elections.
Gintuad man sang partido nga ginsilingan naman mismo ni Pangulong Ferdinand Marcos Jr. ang Kamara nga untaton ang impeachment complaint kag solusyunan ang mga problema nga ginapangatubang sang mga ordinaryo nga Pilipino.
Rason nga indi na lamang suno diri hatagan sang sabat ang lapnagon nga ‘discontent’ kag ‘frustration’ sa pungsod nga nagresulta nagikan sa nagalala nga peace and order, graft and corruption kag kapigaduhon.
Sa katapusan, ginganyat sang partido ang tanan nga mga Pilipino nga botante nga piliin sang instakto kung sin-o ang igaboto ilabi na sa Senado kung sa diin desisyunan ang mangin kapalaran ni VP Sara sa impeachment.
Samtang, natalana nga igapatigayon ang hearing sa impeachment case ni VP Sara sa Hunyo, pagkatapos sang May 2025 elections kag kadungan sa pagbalik sesyon sang Kongreso.
