ROXAS CITY – Nagpatigayon sang ocular inspection sa mga ginbaha nga barangay sa probinsiya sang Capiz ang Provincial Disaster Risk Reduction and Management Council (PDRRMC) Aksyon Tabang kaupod ang reporter sang Bombo Radyo Roxas, isa ka adlaw matapos dalayon nga nag-ayo ang panahon.
Personal nga ginpangunahan ni Mr. Espiridion ”Speed” Pelaez, pinuno sang aksyon tabang ang grupo sa ila nga pagbisita sa mga ginbaha nga lugar sa premier distrito kalakip na ang banwa sang Panit-an, Panay, Pontevedra, President Roxas kag Pilar samtang sa segundo distrito naman ginbisita sang grupo ang banwa sang Sigma, Mambusao, Dumalag, Ivisan kag iban pa.
Sa exclusive interview sang Bombo Radyo Roxas sa isa ka residente sa banwa sang President Roxas, ginpahayag sini nga nahadluk ini para sa iya pamilya bangud sa wala untat nga pag-ulan nga ginsundan pa sang mabaskog nga hangin.
Apang ginpasalamat sini nga wala sang malain nga natabo sa ila nga magpamilya sang nagpanalasa ang bagyo nga Urduja kag wala sila nag-evacuate sa evacuation center.
Samtang amat amat na nga nagahubas ang tubig-baha gikan sa mga apektado nga barangay sa segundo distrito sa diin ginatutukan sang grupo ang mga barangay sa premier distrito labi na sa banwa sang Pontevedra nga ginakabig catch basin sang mga tubig baha gikan sa 2nd district.
Sa pinakaulihi nga report sang PDRRMC, nagaguwa nga nagalab-ot na lamang sa karon sa 56 ka barangay ang ginabaha kag napulo ka pamilya na lamang ang yara sa evacuation centers matapos nagdesisyon ang 862 nga pamilya nga magbalik na sa ila nga mga balay.
