ROXAS CITY – Ginrekomendar na sang Provincial Disaster Risk Reduction and Management Council sa Sangguniang Panlalwigan ang pagpaidalum sa probinsya sang Capiz sa State of Calamity bangud sa epekto sang El Niño Phenomenon.
Sa interview sang Bombo Radyo Roxas kay Atty. Sheila Artillero, pinuno sang Local Disaster Risk Reduction and Management Officer sang probinsya, ginpahayag sini nga matapos ang ginapatigayon nga emergency meeting sang PDRRMC ginkasugtan nga erekomendar na sa Sangguniang Panlalwigan nga ipaidalum na ang bilog nga probinsya sa state of calamity bangud sa tuman nga epekto sang El Niño phenomenon ilabi na sa sector sang agrikultura.
Dugang pa sini nga sandig sa nagin damage assessment report sang Provincial Agriculturist Office naglab-ot na sa P398,085,043.01 ang nangin kahalitan sa mga agricultural crops sa probinsya.
Naglab-ot naman sa 7,930 ka mga mangunguma ang apektado, 8,523.35 nga ektarya sang mga standing crops, 6, 403.03 nga ektarya sang agricultural area kung sa diin 2,122.95 nga ektarya diri ang totally damaged kag 4,280.08 nga ektarya ang partially.
Mahibaluan nga una na nga nagdeklarar ang mga banwa sang Tapaz, Panay, Pontevedra, Dumarao, kag Maayon sang State of Calamity bangud sa tuman nga epekto sang tagilinit sa ila mga banwa.
Magahiwat naman subong nga adlaw sang special session ang Sangguniang Panlalwigan agud aprubahan ang nasambit nga resolusyon kag opisyal na nga madeklarar ang pagpaidalom sa State of Calamity sa probinsya.
Lauman naman suno kay Artillero nga sa tion nga maaprubahan na ang resolusyon sa Sangguniang Panlalwigan sarang na nga magamit sang tagsa ka LGU ang ila nga mga quick response fund agud nga makahatag na sang bulig sa mga apektado nila nga pumuluyo.
