ROXAS CITY – May siyam ka mga Locally Stranded Individuals (LSIs) nga nag-abot kaina sang aga nga sakay sa motor banca gikan sa Romblon.
Ginpahayag ni Mrs. Judy Grace Pelaez, Provincial Disaster Risk Reduction and Management Office (PDRRMO) action officer nga sa nasambit nga numero apat ang sa Capiz kag may yara man nga magapadulong sa Iloilo, Negros kag Palawan.
Gin-athag man ni Pelaez nga mahimo nga maka-travel ang mga LSIs, kinahanglan lamang nga magcomply sa requirements kasubong sang travel authority kag medical certificate.
Antes nag-abot ang mga LSIs, nagpakig-angut na ang talatapan sa natungdan nga mga Local Government Units nga nagpadala sang mga ambulansiya para magsugat sa ila.
Nahibaluan nga padayon man ang koordinasyon sang PDRRMO sa Philippine Coastguard kun may yara sang mga LSIs ukon repatriates nga magaalabutan agud ila man nga ma-impormar ang natungdan nga LGUs nga magasugat sa ila kag magadala sa quarantine facility.
Samtang may nag-abot man nga onse ka mga repatriates kaina sang aga sa diin gindul-ong na sila sa ila nga kabanwahanan.
Duha diri ang sa Roxas City kag banwa sang Dumarao kag tag isa sa Ivisan, Cuartero, Mambusao, Maayon, Pilar, Sapian kag Panay.
Samtang padayon ang monitoring sang talatapan sa nag-alabutan nga mga LSIs kag repatriates sa bulig man sang Barangay Health Emergency Response Team (BHERT) kag sandig sa protocol nga kinahanglan magpaidalum sa rapid test ang mga repatriates sa diin kun magnegatibo ang resulta mahimo na sila nga makapauli sa tagsa ka mga balay.
