Maga-abot sa Glan, Sarangani buwas, Hunyo 14, ang Philippine Emergency Medical Assistance Team (PEMAT) agud maghatag sang espesyal nga serbisyo medikal kag malimpyo nga ilimnon nga tubig para sa mga residente nga naapektuhan sang magnitude 7.8 nga linog sa Mindanao.
Suno sa Department of Health (DOH), ang PEMAT nga halin sa DOH-Cotabato Regional Medical Center ginalakipan sang mga surgeon, obstetrician-gynecologist, emergency medicine specialist, anesthesiologist, pediatrician kag internist.
Kabahin man sang grupo ang mga nurse, midwife, medical kag radiation technologist, physical therapist, mental health specialist, mga inhinyero kag administrative staff.
Magadala man ang grupo sang mga bulong batok sa diarrhea kag isa ka gravity-powered ultrafiltration unit nga may kapasidad nga makahatag sang linibo ka litro sang malimpyo kag luwas nga ilimnon nga tubig para sa mga komunidad nga apektado sang linog.
