Ginahulat na lang sang Provincial Environment and Natural Resources Office (PENRO) Capiz ang resulta sang water quality analysis sa ginapahayag nga kontaminado nga tubig sa suba nga sakop sang Barangay Magubilan sa banwa sang Panay.
Ini kasunod sang mga report nga may pila ka indibidwal nga nakabatyag sang pagpalangatol sang lawas matapos magpaligo sa amo nga suba.
Sa interview sang Bombo Radyo kay Dr. Ernest Federiso, Officer-in-Charge sang nasambit nga talatapan, iya ginpahayag nga posible may yara sang algal bloom sa amo nga suba.
Ang algal bloom amo ang pagdamo sang lumot sa tubig nga posible magtuga sang iritasyon ukon sakit sa panit sang tawo.
Suno kay Federiso, posible isa ini ka natural phenomenon nga natabo bangod man sang mainit nga panahon.
Ginaabisuhan naman ang mga residente sa probinsya sang Capiz, ilabi na ang malapit sa mga suba, nga likawan ang pagpaligo sa suba samtang ginahulat ang resulta sang water quality analysis.
