ROXAS CITY – Nagapatigayon sang imbestigasyon ang Provincial Environment and Natural Resources Office-Deparment of Environment and Natural Resources Office (PENRO-DENR-CAPIZ) angut sa kamatayon sang Grade 10 student nga ginbuntog sang hinuptan nga cobra sa Barangay Bago, Roxas City.
Ginpahayag ni Mr. Ruel delos Reyes pinuno sang CAPENRO-DENR nga dapat magkuha sa ila talatapan sang permit ang tanan nga magahupot sang wild like animals agud mahibaluan ang source ukon ginhalinan sini kag matsekyar ang ila nga permiso.
Kun mahibaluan nga legal ang ginhalinan sang pagahuptan nga wild life animals, gilayon iproseso ang dokumento para mahatagan sang permit.
Apang pananglitan mapamatud-an nga iligal ang source sini, posible nga mabilanggo ang natungdan kag mahimo pa nga magmulta bangud sa paglapas sa Wild Live Act.
Sa kaso sang napatay nga solterito nga ginbuntog sang hinuptan nga cobra, suno sa opisyal nga subject for verification pa ini kag indi pa siya maka-kumpirma kun Philippine cobra ang nagbuntog sa biktima ukon gin-import gikan sa iban nga pungsod.
Apang suno kay delos Reyes nga indi makita ang kasubong nga cobra sa Pilipinas kag malayo ini sa mga ginakabig Philippine cobra.
Samtang nagpahanumdum man ang opisyal sa tanan nga plano maghupot sang mga wild life animals nga magpakig-angut sa ila agud magiyahan man sila sang talatapan sang nagakadapat himoon.
