Ginaduso sang People’s Coalition for Good Governance ang pagpasar sang isa ka mas komprehensibo kag epektibo nga Anti-Political Dynasty Law sa Pilipinas, bilang kabahin sang padayon nga panawagan para sa good governance kag reporma sa sistema sang pulitika.
Sa interview sang Bombo Radyo kay Mr. Wennie Sancho, convenor sang grupo, iya ginpahayag nga kinahanglan na gid sang klaro kag konkreto nga layi nga magabawal ukon magalimit sa pagpadayon sang magkapamilya sa gobyerno.
Suno kay Sancho, ang presensya sang political dynasties nagaresulta sa konsentrasyon sang gahum sa pila ka pamilya nga posible makapahuyang sa patas nga representasyon sa publiko.
Pahayag pa niya, ang Pilipinas ang isa sa mga pungsod sa Asya nga may pinakadamu nga political dynasties.
Apisar pa may constitutional provision nga dapat na nga i-regulate, wala pa gihapon nakapasar sang isa ka national law nga nagapahayag sang eksakto nga sakop kag implementasyon sini.
Sa subong, ginaduso sang nagkalain-lain nga civil society groups ang pagpasaka sang “genuine anti-dynasty law,” nga nagapati nga kinahanglan may klaro nga limitasyon sa kadamuon sang miyembro sang isa ka pamilya nga pwede magserbisyo sa gobyerno sa pareho nga panahon ukon sunod-sunod nga termino.
