Hugot nga ginpamatukan sang Peoples Coalition for Good Governance ang mosyon ni Senador Rodante Marcoleta nga tugutan ang teleconferencing para sa mga senador nga indi makatambong sa impeachment proceedings sa personal.
Sa interview sang Bombo Radyo kay Mr. Wennie Sancho, Convenor sang Peoples Coalition for Good Governance, iya ginpahayag nga indi nagakaigo nga online lang ang pagboto sang mga senador sa isa ka seryoso kag makasaysayan nga proseso kaangay sang impeachment trial.
Suno kay Sancho, importante nga makatambong sa personal ang mga senador agud ipakita ang kabug-aton sang ila responsibilidad bilang judge sa nasambit nga bagay.
Ginhatagan niya pagtamod nga ang impeachment proceeding indi lamang isa ka ordinaryo nga hearing kundi isa ka importante nga proseso sang konstitusyon nga nagakinahanglan sang presensya, partisipasyon, kag accountability sang tagsa ka senador.
Dugang pa ni Sancho nga kun pahanugutan ang online participation sa pagboto, mahimo nga kwestyunon sang publiko ang integridad kag kredibilidad sang Senado bilang isa ka institusyon.
Pahayag pa niya nga ang Senado isa ka madugay na nga ginatahod nga institusyon gani indi dapat pagtan-awon nga isa ka “circus” ukon joke sa mata sang mga pumuluyo.
Nagapati man si Sancho nga mangin mas matawhay, transparent kag credible ang proseso kon ang tanan nga mga senador physically present sa mga importante nga deliberasyon kag pagboto.
