Gintawag nga “kahuluya”” sang Peoples Coalition for Good Governance ang padayon nga kinagamo sa Senado, bangud sang epekto sini sa pagtuman sang mga importante nga katungdanan sang lehislatura.
Sa interview sang Bombo Radyo kay Mr. Wenie Sancho, convenor sang nasambit nga grupo, iya ginpahayag nga daw kaangay nga mas ginauna pa sang pila ka senador ang ila personal nga interes kaysa sa kaayuhan sang mga Pilipino.
Suno kay Sancho, ang padayon nga indi pag-ugyon sang majority kag minority bloc ang nagatuga sang pagka-delay sa pagtalakay kag pagpasa sang mga importante nga mga layi.
Pahayag pa niya, ang sitwasyon sa subong ang nagapakita sang bulok nga sistema politikal sang pungsod nga dapat nga mahatagan sang reporma .
Nagalaum naman ang natungdan nga magbalik na ang pag-ugyon sang mga miyembro sang Senado agud mas ma- focus na sa mga importante nga isyu ginapangatubang sang Pilipinas.
