Nagapanawagan ang People’s Coalition for Good Governance kay President Ferdinand Marcos Jr. nga gamiton ang masunod nga State of the Nation Address (SONA) agud maipabutyag sa mga Pilipino ang matuod nga kahimtangan sang pungsod.
Sa interview sang Bombo Radyo kay Wennie Sancho, convenor sang People’s Coalition for Good Governance, ginpahayag sini nga importante nga mangin maathag ang Presidente sa pagplastar sang kahimtangan sang ekonomiya, pang-gobyerno, kag iban pa nga nagapanguna nga mga isyu nga ginaatubang sang pungsod.
Suno kay Sancho, nagalaom man sila nga ipakigbahin sini ang mga konkreto nga tikang sang administrasyon agud mapanabat ang mga opisyal nga lakip sa kurapsyon sa gobyerno.
Pahayag pa sini, dapat gamiton ni Marcos ang nabilin nga panahon sang iya pagka-presidente agud mapadayon ang mga reporma kag masolbar ang nagkalain-lain nga problema nga ginaatubang sang pungsod.
Nagalaom man ang natungdan nga pamatian ang tingog sang mga ordinaryo nga Pilipino kag hatagan importansya ang mga kinahanglanon, kag kabudlayan sa nabilin nga mga tuig sang iya administrasyon.
