Nagapamatok ang People’s Coalition for Good Governance sa ginaduso nga pagpa-iway sang Barangay and Sangguniang Kabataan Elections 2026.
Sa interview sang Bombo Radyo kay Mr. Wennie Sancho, Convenor sang coalition, iya ginpahayag nga pulitika naman ang mayor nga rason sa likod sang proposal bangud nagapati ini nga ang pag-delay sang eleksyon tubtob sa 2028 ang magahatag sang kahigayunan sa mga politiko nga pabaskugon ang ila impluwensya sa barangay.
Ginakwestyon man ni Sancho kun nagapatigayon man sang general consultation ang mga mamalidha sa mga residente sang barangay antes iduso ang pagpaiway sang eleksyon.
Ginbali man sang natungdan ang pahayag sang mga mamalidha nga magasto ang pagpatigayon sang eleksyon bangud suno sa iya, may napain na nga pondo para diri.
Suno sa iya, importante nga democratic exercise ang eleksyon kag madamo sang mga botante ang luyag nga maislan na ang ila opisyal sa barangay sa diin ang pagpili sang insakto nga lider ang indi dapat pagpunggan sang mga politiko.
Nagpahanumdom man ang natungdan sa mga mamalidha nga amo ang gin-eleher sang tawo kag wala ang mga ini sang kinamatarong nga manduan ukon i-insister ang pagpaiway sang eleksyon.
