Nagapanawagan ang People’s Coalition for Good Governance nga dapat maibalik ang dungog kag dignidad sang pungsod bangud sang mga nagakatabo subong sa pulitika sa Pilipinas.
Ini kasunod sa shooting incident sa sulod sang Senado sang Mayo 13, 2026.
Sa interview sang Bombo Radyo kay Wennie Sancho, convenor sang People’s Coalition for Good Governance, iya ginpahayag nga nagaguwa sa Senado ang mga “undesirable political practices” ukon indi maayo nga pamatasan sa pulitika.
Suno kay Sancho, nadula na ang moral kag ethical values sang pila ka mga lider kag wala na sang maayo nga ehemplo nga ginapakita ang Senado para sa publiko.
Dugang pa sini nga imbes nga mangin institusyon sang accountability kag responsibilidad, nagapakita na lamang ang Senado sang “political survival.”
Nagalaom naman ang grupo nga mangin maayo nga ehemplo ang mga lider sang gobyerno agud mabalik ang pagsalig sang publiko sa mga institusyon sang gobyerno.
