Nagpanawagan ang People’s Coalition for Good Governance sang mas matuod nga accountability kag transparency sa gobyerno agud masiguro nga nagakaigo ang paggamit sang pondo sang pungsod.
Sa interview sang Bombo Radyo kay Mr. Wennie Sancho, convenor sang People’s Coalition for Good Governance, iya ginpahayag nga nagakadapat nga sukton ang mga opisyal nga nalakip sa kurapsyon kag papanabton sa ila mga ginhimo.
Suno kay Sancho, trustee lamang ang mga nagapungko sa pwesto sa gobyerno kag indi sila ang tag-iya sang kaban sang pungsod.
Gani, responsibilidad nila nga gamiton ang pondo sang gobyerno sa matarong kag episyente nga pamaagi.
Pahayag pa niya, ang kaban sang gobyerno dapat gina-alokar sa mga proyekto kag programa nga makahatag sang direkta nga benepisyo sa katawhan, imbes nga magamit sa personal nga interes ukon korapsyon.
Nagalaum man ang natungdan nga pinaagi sa padayon nga panawagan sang accountability kag transparency, matapos na ang kurapsyon kag masiguro nga ang pondo sang gobyerno magamit sa insakto kag makabulig sa pagpauswag sang kabuhi sang mga Pilipino.
