Ginpakigbahin sang kapulisan nga may yara na sang “person of interest” angut sa kamatayon sang isa ka senior citizen nga nasapwan-patay sa Sitio Bulon, Barangay Bilao, Sapian, Capiz.
Matandaan nga ginkilala ang biktima kay Dionila Doroteo, 71-anyos nga residente sang nasambit nga lugar.
Sa interview sang Bombo Radyo kay PCPT Merry Chris M. Dela Cruz, hepe sang Sapian MPS sa karon, hawid na nila ang isa ka dokumento nga kun sa diin nakasulat ang gintunaan sang kamatayon sang biktima amo ang naangkon sini nga pilas sa ulo.
Dugang pa sini nga nagapangita na sa karon ang mga otoridad sang magatindog nga witness para sa ginatumod nga “person of interest” nga suspek kun sa diin, tubtob sa karon wala pa nakita sa lugar kag padayon man ini nga gina-monitor sang mga kapulisan.
Samtang, desidido naman ang pamilya sang biktima nga magpasaka sang kaso kag sa karon, nagapangita man ang mga ini sang witness para mahatagan sang hustisya ang pagkamatay sang ila himata.
Panugyan ni Dela Cruz sa mga Sapianon, i-secure ang mga kaugalingon, mga panimalay kag i-tsekyar ang miyembro sang pamilya agud malikawan ang kasubong nga insidente.
Sa karon, nagapadayon pa ang ginapatigayon nga imbestigasyon sang mga kapulisan angut sa natabo nga krimen.
