ROXAS CITY – Ginkompirmar sang isa ka residente sang Barangay Bolo, Roxas City nga may yara sang patay nga persona nga nalakip pa sa listahan sang mga benepisyaryo sang Social Amelioration Program (SAP) sang Department of Social Welfare and Development (DSWD).
Suno kay alyas Tata, mismo ang himata sang napatay nga si Clarito Adagao ang nagkompirmar nga napatay na ini.
Nagalain ang buot sang ginang bangud suno diri, ginalakip pa ang patay sa listahan sa pihak nga madamo sila nga buhi nga mas nagakinahanglan sang bulig apang wala ginlakip nga mangin benepisyaryo sang amo nga ayuda.
Gindugang pa sang ginang nga mismo ang ila mga Barangay Health Workers (BHW’s) ang may pinilian sa pagtumod sang SAP beneficiaries bangud ila ginapasulabi ang ila kakilala kag pamilya.
Sang ginpadulungan sang Bombo Radyo News Team ang pamilya Adagao, ginkompirma mismo sang anak sang napatay nga pangalan sang iya amay ang napagkit sa listahan.
Suno diri nga may yara siya sang utod nga ‘Jr.’ sang iya amay apang didto man ini nagatenir sa Metro Manila.
Suno diri nga posible nagsala lamang ang mga BHW’s apang suno diri nga nagdangop na siya sa mga opisyales sang barangay kag naghinyo nga kun mahimo nga sila na lamang ang ma-claim sang nasambit nga ayuda.
Ginpahayag naman sang umagad ni Clarito nga wala niya ginbutang ang pangalan sang iya ugangan sa form para sa mga SAP beneficiaries.
Ini bangud ginhambalan siya nga ang pangalan lamang sang mga tawo nga yara sa isa ka household ang ibutang sa nasambit nga form.
Aminado siya nga nakibot man sila nga nalakip ang pangalan sang iya napatay nga ugangan sa nasambit nga listahan.
