ROXAS CITY – Ginpabalik sa probinsiya sang Aklan ang isa ka indibidwal nga patago nga nagpauli sa probinsiya sang Capiz.
Gilayon nga ginpadulungan sang mga katapo sang Mambusao Municipal Police Station, Rural Health Unit, Municipal Disaster Risk Reduction and Management Office (MDRRMO) kag mga barangay tanod ang balay sang nasambit nga persona sa Barangay Libo-o, Mambusao matapos nakompirmar nga nagpauli ini sang patago gikan sa Banga, Aklan.
Sandig sa impormasyon nga nakuha sang Bombo Radyo, nakapauli ang nasambit nga persona sa ila balay sadtong Abril 17.
Ginapahayag nga nagsakay ini sa isa ka truck kag nagpanago rason nga nakalusot sa ginapatigayon nga border checkpoint sang mga kapulisan sa Barangay Damayan, Sapian, Capiz.
Mahibaluan nga hugot ang pagpatigayon sang monitoring sang lokal nga gobyerno sang Mambusao sa mga nagaguwa kag nagasulod sa amo nga banwa matapos nakapagkit sang isa ka kompirmado nga kaso sang coronavirus disease (COVID-19) sa lugar.
