Ginapabakod pa sang Provincial Government of Capiz ang preparasyon para sa pagpatigayon sang World Café of Opportunities: Career and Skills Expo 2026, nga ipatigayon para makahatag sang mas madamo nga oportunidad sa trabaho, skills training, kag iban pa nga livelihood kag career opportunities para sa mga Capiznon.
Sa Interview sang Bombo Radyo Roxas kay Mr. Prince Rovic Gardose, Sangguniang Kabataan Federation President sang Province of Capiz, iya ginpahayag nga padayon ang pagbulig sang Provincial Government sang Capiz, upod ang Public Employment Service Office ukon PESO, sa pagpanguna ni PESO Manager Mr. John Leo Beldia, agud masiguro nga mangin organisado kag madinalag-on ang pagpatigayon sang World Café of Opportunities.
Suno sa iya, isa sa mga ginahatagansang pagtamod subong amo ang pagpatigayon sang coordination meetings upod ang nagkalain-lain nga mga eskwelahan, ahensya sang gobyerno kag iban pa nga organisasyon nga mangin kabahin sa aktibidad.
Pangunahon nga ginatalakay sa sini nga mga pagtililipon ang nagkalain-lain nga detalye kag tikang agud mangin hapos ang pag-coordinate sang mga partisipante kag benepisyaryo sang programa.
Importante man, suno kay Gardose, ang pagdisseminate sang impormasyon ilabi na sa mga kabtaan agud mahibaluan nila ang mga oportunidad nga ila ma-avail sa World Café of Opportunities.
Gina-engganyo ang mga kabataan nga magpabutyag sang interes kag magkuha sang impormasyon parte sa mga job vacancies, skills training, kag iban pa nga oportunidad nga igahatag sa sini nga aktibidad.
Suno pa kay Gardose, indi lamang ang Provincial Government kag PESO ang nagabulig sa pagpatigayon sang programa, kundi lakip man diri ang nagkalain-lain nga TESDA schools kag iban pa nga mga ahensya kag organisasyon nga naga-partner para sa amo nga aktibidad.
Pinaagi sa pagbulig sang mga ahensya, ginapaabot nga mas madamo nga kabataan kag mga fresh graduates ang makabenepisyo kag makakita sang oportunidad nga angay sa ila nga skills, educational background kag career goals.
Matandaan nga yara sa masobra 8,000 nga vacant job opportunities ang igahatag ukon i-offer sa World Café of Opportunities, nga nagatuyo sa pag-connect sang mga jobseekers kag fresh graduates sa mga employer kag iban pa nga mga opportunity providers.
Ini ang ginapaabot nga mangin daku nga oportunidad para sa mga Capiznon nga nagapangita sang ila una nga trabaho, nagapangita sang bag-o nga career opportunity, ukon luyag nga magpa-develop sang ila skills.
Ang World Café of Opportunities: Career and Skills Expo 2026 gin-pagahiwaton sa Agosto 22, 2026, kag ginapaabot ang pagdagsa sang mga kabataan, fresh graduates kag iban pa nga mga jobseekers.
Samtang padayon ang preparasyon, ginapahayag sang mga organizer ang importansya sang aktibo nga pagpartisipar sang kabataan agud indi lamang sila mangin beneficiaries sang programa kundi mangin kabahin man sang mas malapad nga tikang para sa youth employment kag career development sa probinsya sang Capiz.
Ginpahayag man nga ang pagpatigayon sang coordination kag information dissemination antes ang aktwal nga aktibidad importante agud masiguro nga ang mga target nga benepisyaryo makabaton sang husto kag ensakto nga impormasyon parte sa mga oportunidad nga ila ma-avail.
