ROXAS CITY – Nangin madinalag-on ang ginhiwat nga PISO Caravan nga ginpangunahan sang Bangko Sentral ng Pilipinas (BSP) subong nga adlaw nga ginhiwat sa isa ka dako nga mall sining syudad.
Tinutuyo sini agud mabayluhan ang mga madugay na, yukot kag gisi nga papel nga kwarta kag mga sensilyo sang mga bag-o.
Sa mensahe nga ginpakigbahin ni Gregorio Bacay III, Bank officer V, Head sang Regional Economic Affairs Staff of BSP Visayas Regional Office, ginsiling sini nga ang mga dunot kag madugay na nga kwarta ang para sa bangko ka gang mga bag-o para sa tawo.
Suno kay Bacay dako ini nga bulig sa tanan bangud nakahibalo sila nga madamo pa ang may yara sang gintipon nga daan nga kwarta sa diin wala sa karun ginabaton sa mga tindahan.
Nagatan-ay man sila sang bulig sa mga may luyag nga mag-open sang bank account ukon e-wallet.
Ang nasambit nga aktibidad ang nagsugod alas 10:00 sang aga tubtob alas 5:00 sang hapon.
Bangud sini, madamo nga mga tawo ang nagpadulong sa lugar agud mabayluhan ang ila mga kwarta kag liwat nga magamit sa pagbakal.
