Ginfile sang health reform advocate nga si Dr. Tony Leachon, ang petition for certiorari and prohibition sa Korte Suprema nga nagakwestiyon sa legalidad sang zero subsidy ukod wala pag-alokar sang subsidiya sa Philippine Health Insurance Corporation (PhilHealth) sa idalum sang 2025 national budget.
Kalakip sa mga respondent sa nasambit nga petisyon amu sanday House Speaker Martin Romualdez, Senate President Francis “Chiz” Escudero kag Executive Secretary Lucas Bersamin.
Sa petisyon ni Dr. Leachon, iya ginhinyo sa Korte nga mag-isyu sang temporary restraining order ukon writ of preliminary injunction agud mapa-untat ang pagpatuman sang 2025 General Appropriations Act (GAA) may kaangtanan sa zero subsidy para sa state insurer.
Ginhinyo man sini sa Korte nga mag-isyu sang writ of mandamus agud manduan ang nagakaigo nga mga ahensya sang gobyerno nga gilayon magpain kag magpaguha sang kinahanglan nga mga pondo para sa PhilHealth kadungan sa Universal Health Care Act kag 1987 Constitution.
Pahayag sang health reform advocate nga ginfile sini ang nasambit nga petisyo bangud sa unconstitutional ukon paglapas sa layi ang indi pag-alokar sang subsidiya sa PhilHealth nga una nga tion natabo sa kasaysayan sang pungsod kung sa diin wala suno diri ginahatagan sang balor ang ikaayong lawas sang mga Pilipino sang Presidente sang Pilipinas mangin sang Senate President ukon ang Manubo nga Panalgan sang Kongreso.
Mahibaluan nga ang pag-realign kag pagsaka sang pondo para sa iban nga mga sektor partikular na sa House kag Senado ginhimo suno diri sa indi maayo nga pamaagi kung sa diin nagakuha sa mga Pilipino sang kinamatarong para sa isa ka transparent nga proseso sang pagpondo.
Sa baylo, ginhatagan suno diri sang pagtamud sang mga respondent ang indi paglakip sa Philhealth sa pondo pinaagi sa masobra ukon menus P600 billion nga reserve funds.
Ang pagfile sang petisyon sa tunga sang liwat nga pagpatigayon sang Korte Suprema sang oral arguments sa mga kaso nga nagaganyat sa pagsaylo sang pondo nagikan sa PhilHealth padulong sa national treasury.
