ROXAS CITY – Mas ginpasangkad pa sang Philippine Army (PA) kag sa bulig sang Philippine National Police (PNP) ang pagmonitor sa seguridad sa bug-os nga Panay Island matapos and asud-asod nga insidente sa pagkaulamid sang mga public officials.
Sa interview sang Bombo Radyo kay Captain Roel Maglalang, Civil Military Operations Officer, 301st Brigade sang Philippine Army (PA), ginasiguro sini nga naka-heightened-alert ang mga kasuldadohan agud indi matabo sa Panay Island ang nagakahinabo nga pagpatay sa mga public officials sa iban nga lugar, kaangay na lang sa Paloma Massacre kun sa diin ginpaarakan sang mga armado nga grupo si Negros Oriental Governor Roel Degamo sa kaugalingon nga compound nga nagresulta sang kamatayon sang gobernador kag 8 ka sibilyan.
Gintuad man ni Maglalang, nga sa karon wala pa sang public officials ang nakareport sa PA nga may nababaton nga pagpamahog sa ila kabuhi ukon death threat kag kontrolado man ang political rivalry sa lugar.
Suno diri, may ginamonitor na sila nga armado nga grupo apang ginasiguro sini nga mahatag sang Philippine Army ang seguridad kag maprotektahan ang pumuluyo.
Sa pihak nga bahin, dismayado ini kag ang bug-os nga hanay sang Philippine Army matapos nga anay mga suldado nga nag-AWOL sa serbisyo ang mga suspek sa pagpatay kay Gov. Degamo, sa karon may tikang na nga ginadihon ang PA agud indi maliwat ang kaangay nga hitabo.
