Liwat nga nag-abiso ang Embahada sang Pilipinas sa Israel sa mga Pilipino bangud sa security concerns sa tunga sang naga-init nga tensyon sa Middle East.
Sa abiso nga ginpaguha sang Embahada, ginlaygayan ang mga Pilipino nga likawan ang pagpadulong sa mga lugar sa Jerusalem partikular sa Temple Mount, Damascus fate, Herod’s Gate, Al Wad road, Musrara Road kag sa bisinidad sang East Jerusalem.
Subong man sa West Bank, mga lugar nga malapit sa border sang Gaza kag Lebanon, Golan Heights kag mga lugar nga malapit sa mga military base ukon outpost kag mga power kag water facilities.
Ginlaygayan man ang mga Pilipino nga likawan nga magpadulong sa pampubliko nga lugar kaangay sang malls kag markets subong man ang pagtambong sa dalagkuan nga aktibidad kaangay sang concerts, rallies kag festivals.
Ginadumilian man nga magpalapit sa mga Israeli security forces nga nakapuwesto sa mga sensitibo nga lugar kag sundon ang mga panugyan sang Israeli security forces kag Home Front Command.
Mahibaluan nga ang panibag-o nga abiso nagikan sa Embahada kadungan sang pagdumdum sang ika-1 anibersaryo sang October 7 attack sang Hamas sa Israel sa tunga sang nagapadayon nga conflict sa tunga sang Israel batuk sa mga magkaalyado nga Hamas, Hezbollah kag Iran.
