Ginkumpirma sang Philippine government nga may mga Pilipino nga seafarer sa isa ka commercial vessel nga gin-atake sang mga rebelde nga Houthi sa Red Sea, kag ginapatigayon na subong ang rescue operation
Nahibaluan nga nag-angkon sang damage sa makina ang cargo ship nga Eternity C matapos naigo ini sa isa ka pag-atake sang grupo nga Houthi nga suportado sang Iran.
Ginpahayag sang Department of Migrant Workers (DMW) nga nagapabilin ang crew sa barko kag direkta nga nagapakig-angut ang gobyerno sa kapitan sang barko nga isa ka Pilipino.
Apisar may mga indi pa kumpirmado nga report sang mga napatay, nagahulat pa ang departamento sang mga verified nga impormasyon gikan sa mga internasyonal nga sources kag operator sang barko.
Samtang, ginpasiguro ni DMW Secretary Hans Leo Cacdac sa publiko nga aktibo nga gina-monitor sang gobyerno ang sitwasyon kag nagapakig-angut sa mga ahensya agud masiguro ang kaluwasan sang crew.
Ginpahayag man ni Cacdac nga may mga guidelines na nga ginapatuman sumugod pa sadtong 2024 nga nagahatag ligwa sa mga Pilipino nga seafarer nga likawan ang mga biyahe padulong sa mga lugar nga may tensyon sa Red Sea. Ang mga guidelines nga ini ang nagapabakod sa ila nga kinamatarong nga magpamalibad sa deployment sa mga high-risk nga lugar.
Suno sa guidelines, kinahanglan nga mag-report ang mga tag-iya sang barko kag mga manning agency sang ila mga plano nga mag-agi sa Red Sea, agud mabuligan sang mga awtoridad nga subaybayan ang mga katalagman para sa mga Filipino workers.
Samtang ang focus amo ang pagluwas sang mga crew, ginpahayag ni Cacdac nga usisaon man sang gobyerno kun nakasunod ang shipping company kag manning agency sa mga naga-exist nga safety protocols.
Wala pa ginbuyagyag sang DMW ang eksakto nga numero sang mga Pilipino nga seafarer sa barko apang ginpahayag sini nga magahatag sang dugang nga update kun na-verify na ang mga impormasyon.
Ang Cosmoship Management, nga nagadumala sa Greek-operated nga bulk carrier nga Eternity C, ang nagpahayag sa Reuters nga may 22 ka miyembro sang crew sa barko kun sa diin 21 ang mga Pilipino kag isa ka Russian sang atakihon ini sang mga sea drones kag mga skiff.
Suno sa isa ka opisyal nga may nahibaluan sa isyu, apat ka seafarer sa Eternity C ang napatay, suno sa report sang Reuters.
Indi naman available ang Cosmoship Management agud maghatag sang komento angut sa mga na-report nga napatay.
Duwa pa nga crew members ang napilasan, suno sa isa ka opisyal gikan sa Aspides, ang misyon sang European Union nga ginpahamtang agud protektahan ang mga barko sa Red Sea.