ROXAS CITY – Kinahanglan tun-an sa liwat sang gobyerno sang Pilipinas ang posible pagsulod sang Commission on Human Rights (CHR) sa tion nga manindugan ang gobyerno nga indi magkooperar sa imbestigasyon sang International Criminal Court (ICC) natuhoy sa ‘war on drugs’ sang administrasyon ni anay Presidente Rodrigo Duterte.
Ini ang ginpahayag ni Atty. Nelson Borja isa ka criminal lawyer sang mainterview sang Bombo Radyo, gintuad sini nga matuod nga mabudlayan ang ICC sa pag-imbestiga kun indi magkooperar ang Pilipinas, apang sa tion nga magsulod na ang CHR, nga isa ka independent kag constitutional body, nagakahulugan indi mahimo hilabtan sang Department of Justice (DOJ) ang imbestigasyon sa war on drugs.
Bangud sini, indi na mabudlayan ang ICC sa paghinyu sa CHR nga magrequest sang police authority agud i-implementar ang warrant of arrest batuk kay Duterte kag Senator Bato dela Rosa.
Indi man malikawan sang Pilipinas ang posibilidad pagpataw sang economic kag political sanction kun magpakatig-a sa imbestigasyon, ilabi na malapad ang sakup kag impluwensya sang ICC kun sa diin miyembro sini ang mga dalagkuan nga pungsod.
Sa tion nga ini ang matabo, indi na maka-cooperate ang Pilipinas sa nga agreement kag tuman nga maapektuhan ang ekonomiya sang pungsod.
Samtang ginsiling ni Borja, nga indi man mapanginwala sang gobyerno nga sakup ang pungsod sa jurisdiction sang ICC, bangud sa duha ka rason, una nangin miyembro sang ICC ang Pilipinas humalin sang 2011 – 2019 kag pagfile sang petisyon nga i-suspend ang imbestigasyon.
Suno sa abogado, ang pagfile sang petisyon ang isa ka kumpirmasyon nga sakup sang jurisdiction sang ICC ang Pilipinas kag gina-imbestigahan lamang sang ICC ang mass killing may kaangtanan sa war on drug campaign ni Duterte nga natabo sang 2016-2019.
Mabudlay man suno diri mapamatud-an nga si Duterte kag Dela Rosa ang sa likod sang pagpatay bangud wala sang ebidensya nga makatudlo nga ang mga nasambjt nga persona ang nagmandu nga magpatay.
