Ginalauman nga maga-import sang mas madamo pa nga bugas ang Pilipinas sa mga masunod nga tuig rason nga nagapabilin gihapon ini nga numero uno sa pag-import sang bugas sa bilog nga kalibutan.
Ini ang ginapahayag nga epekto man sang El Niño, La Niña, kag mga nag-agi nga mga bagyo sa local production.
Base sa latest report gikan sa US Department of Agriculture (USDA), ginabulubanta nga magadangat sa 4.7 million metric tons (MT) ang rice imports sang pungsod subong nga tuig 2024. Ini ang 2.2% nga mas mataas halin sa nauna nga pagrekord nga yara sa 4.6 million MT bangud sang mabaskog nga demand sang bugas halin sa Vietnam.
Samtang, pag-abot naman sang tuig 2025, ginalauman nga magataas pa ang rice imports sang pungsod sa 4.9 million MT bangud sa mas gamay nga ani sang mga lokal nga mangunguma.
Ang panibag-o nga pagrekord sang USDA ang alinsunod sa mas mataas nga forecast para sa pangkalibutanan nga rice imports subong nga tuig, nga gina-angut sa pagtaas sang demand sang bugas halin sa Malaysia kag Nepal.
