ROXAS CITY – May pila ka mga pagbag-o sa pagsulundan kag pag-akomodar sa mga miyembro sang Philippine Health Insurance Corporation (PhilHealth) bilang kabahin sang ila preventive measures batuk sa coronavirus disease (COVID-19).
Ini ang ginpahayag ni PhilHealth-Capiz Manager Joe Frederick Diaz sang mainterview sang Bombo Radyo.
Suno kay Diaz, antes magsulod ang mga miyembro nga may transaksiyon sa ila talatapan, kinahanglan nila nga maggamit sang alcohol nga nahamtang sa pwertahan sang opisina.
Nagapatuman man ang nasambit nga talatapan sang social distancing kun sa diin may antad ang tanan nga miyembro sa isa kag isa.
Bangud diri suno kay Diaz, ila ginalimitahan ang mga nagasulod sa opisina depende sa kapasidad kag sitting capacity sang talatapan.
Aminado si Diaz nga madamo ang nagapadulong sa ila talatapan sini nga bulan sang Marso bangud sa nagahilapit nga deadline sang pagbayad sang PhilHealth premium para sa 1st quarter sang tuig.
Apang nagpanugyan ini sa publiko nga indi na paghulaton pa ang deadline sa katapusan sang Marso ilabi na sa mga self-employed members.
Gindugang pa ni Diaz nga nagapatuman man sila sang 4-day work week scheme sa ila mga empleyado.
