ROXAS CITY, CAPIZ- Ginpabugal sang PhilHealth Capiz ang mataas nga performance sang ahensya sa rehiyon sa operational report sini halin Enero tubtob Agosto 31, 2025.
Sa interview sang Bombo Radyo kay Joe Frederick Diaz, Head sang PhilHealth-Capiz, naglab-ot na sa 7.5 milyon ang rehistrado nga miyembro sa Region VI, samtang tanan na nga mga Pilipino ang sakop na sang PhilHealth.
Suno kay Diaz, sa Capiz, yara sa 42.21% na sang mga pumuluyo ang rehistrado sa Yaman ng Kalusugan Program (YAKAP), ukon katumbas sang 353,509 ka mga indibidwal.
Pahayag pa nya, naglab-ot naman sa P212.1 milyon ang YAKAP payments sa rehiyon, samtang nagapanguna sa mga ginabayadan ang Pneumonia cases kag Hemodialysis procedures.
Yara naman sa P4.079 billion ang natipon sang PhilHealth sa rehiyon halin sa target sini nga P6.1 bilyon para sa 2025.
Dugang pa sang natungdan, padayon man ang panawagan sang ahensya sa mas madamo pa nga health providers nga magpa-accredit para sa mas maayos nga serbisyo.
Interviewed by Bombo Sunnie Mae Constantino Batencila
