ROXAS CITY – Gindayaw sang Philippine Army ang pagpapasar sang resolusyon sang konseho sang syudad sang Roxas sang damlag lang nga naga deklarar nga persona non grata ang mga katapo sang communist terrorist group.
Suno kay Lieutenant Colonel Joel Benedict Batara, commander sang 61st Infantry Battalion sang Philippine Army ginadayaw sini ang nangin tikang sang konseho sang syudad sang Roxas.
Bangud sini mapabatyag sang gobyerno kag pumuluyo nga wala sang mga ini gina abi-abi ang presensya sang mga katapo sang communist terrorist group kag wala sang lugar ang mga ini diri sa syudad sang Roxas.
Gindugang pa ni Lt. Col Batara nga sa pihak makabig nga white area ang syudad, nga kun sayuron wala sang puwersa sang mga rebelde, apang diri sila nagapatigayon sang extortion activities kag malapnagon nga pagpang recruit.
Kadungan sini gin enganyo sang opisyal ang mga katapo sang rebelde nga grupo nga hingalitan ang ini nga tiun sa pagsungka kag pagbalik sa sabak sang gobyerno kag mag avail sang enhanced comprehensive local integration program ukon e-clip.
Ginakabig man ni Batara nga yara sa karun sa momentum sang ila nga kampanya batuk sa mga terorista ang militar bangud sa epektibo nga pagpatuman sang executive order number 70 ni Presidente Rodrigo Roa Duterte nga nagatuyo nga matuldokan na ang Local Armed Conflict pinaagi sa whole of nation approach agud maangkon ang kalinong kag katawhay sa bug-os nga pungsod.
