Ginakundenar sang Philippine Army ang barbariko nga akto kag brutal nga pagpatay sang mga katapu sang CPP-NPA sa isa ka miyembro sang Community Support Program Sustainment team sang militar nga naba-se sa Barangay Lahug, Tapaz, Capiz.
Ginpahayag ni Major Cenon Pancito III, spokesperson sang 3ID sang Philippine Army nga makabig brutal ang pagpatay kay Corporal Frederick ‘’Lec-Lec’’ Villasis 33-anyos bangud gingapos ang duha sini ka kamot kag patalikod nga ginluthang sang mga katapu sang ginapatihan Central Front Kilusang Rehiyon-Panay.
Gintawag man ni Pancito nga summarily executed ang biktima kag wala sang kaluoy nga ginpatay nga isa ka paglapas sa International Humanitarian law.
Suno sa opisyal nga ba-se sa inisyal nga imbestigasyon, ginamaneho sang biktima ang motorsiklo angkas si Kagawad Analyn Giganto padulong sila sa munisipyo kaupod ang duha pa ka mga motorsiklo nga sakay ang kapitan sang Barangay Lahug kag mga cafgu members para maghulam sang ambulansiya kag magfollow-up sa pila ka mga proyekto.
Apang ginbangga-an sila sang mga NPA kasunod ang paggapos sa kamot ni Villasis kag pagluthang sang patalikod sa biktima.
Wala pa nakuntento ang mga terorista nga NPA kag ila pa ginsunog ang motorsiklo sang biktima kag gin-alegar nga gindala sa ila pagpalagyo ang armas ni Villasis.
Nagapati si Major Pancito nga isa na ka desperado nga tikang ang ginhimo sang mga NPA bangud ila nakita ang maayo nga epekto sang mga programa sang gobyerno sa mga pumuluyo.
Nabalaka sila nga isa ka adlaw wala na sila sang dangpan nga mga residente bangud nakabugtaw na ang mga pumuluyo sa kamatuoran nga wala sang kaayuhan ang nahatag sa ila ang NPA.
Nahibaluan nga may duha ka mga kabataan si Villasis nga residente sang Barangay Jaena Norte, Jamindan apang nakapangasawa kay Shella Villasis sang Barangay Cogon, Sigma, Capiz.
