Nagpatigayon ang Philippine Army kag Philippine Air Force sang joint exercise bilang kahandaan sa depensa sa banwa sang Bugasong, Antique.
Sa interview sang Bombo Radyo kay Major Jecey R. Batiller, spokesperson sang 3rd Infantry (Spearhead) Division sang Philippine Army, ginpatigayon ang Field Training Exercises sang Philippine Army-Philippine Air Force Interoperability Exercise nga ginsugudan sang Oktubre 19 kag ginalauman nga matapos sa Oktubre 23, 2026.
Ang joint exercise ang ginpatigayon sa Barangay Ilaures kag Barangay Camangahan sa nasambit nga banwa, kun sa diin ginapraktis sang mga tropa ang nagkalain-lain nga operasyon lakip na ang air support, artillery operations, ground maneuver, aviation mobility, casualty evacuation, airborne insertion kag search-and-rescue activities.
Nangin sentro man sang amo nga aktibidad amo ang counter-amphibious landing operation, kun sa diin ginsimulate ang pagsulod sang puwersa sang kaaway paagi sa pagdungka sa baybayon.
Paagi sa coordinated operation sa duta kag kahawaan, ginatuyo nga mapauswag ang pagbinuligay sang duha ka sangay sang militar sa pagpugong sang posible nga hitabo.
