ROXAS CITY – Naka-alerto na ang mga katapo sang Philippine Army kag Philippine National Police kadungan sa nagahilapit nga selebrasyon sang anibersaryo sang Communist Party of the Philippines ukon CPP sa maabot nga Disyembre 26 sini nga tuig.
Sa interview sang Bombo Radyo ginpahayag ni 61st Infantry Battalion commander Lieutenant Colonel Joel Benedict Batara nga ginpasangkad na sa karun sang militar ang ila nga combat operations kag intelligence gathering kadungan sa ginalauman nga pagsabwag sang kalakasan sang mga rebelde sa ila nagahilapit nga ika-51 ka tuig nga anibersaryo sang CPP nga gintukod sang Disyembre 26, 1968.
Suno kay Batara, disperado na ang mga rebelde nga mabatyagan sa gihapon ang ila presensiya sa isla sang Panay sa pihak nga padayon nga nagahuyang ang ila nga puwersa kag impluwensiya sa rehiyon.
Ginpaandaman man sang opisyal ang mga katapo sang militar kag pulisya nga mag-aligmat sa ginalauman nga patraidor nga pag atake sang Sparrow unit sang mga rebelde bangud indi sang mga ini masarangan nga maka engkwentro ang puwersa sang gobyerno rasun nga masami pa-traidor ang pag atake nga ila ginabuhat.
