ROXAS CITY – Nagpahanumdom ang tagpamaba sang Philippine Army sa mga ginikanan nga ginapasugtan ang ila mga kabataan nga magtambong sa rallies may kaangtanan sa nangin resulta sang nagtakup nga eleksyon.
Sa interview sang Bombo Radyo kay Captain Kim Apitong, tagpamaba sang 3rd Infantry Division sang Philippine Army, ginpahayag sini nga indi dapat pagsugtan sang mga ginikanan ang ila kabataan nga magpartisipar sa nasambit nga aktibidad, bangud isa ini ka istratehiya sang mga rebelde nga grupo agud mag-upod sa ila kawsa.
Suno pa diri, apisar nga wala pa sa karon naproklamar ang mga nagdaog sa national nga lebel, bal-an na kun sin-o ang nagmadinalag-on sa eleksyon, gani dapat ini nga respetuhon.
Samtang, nangin generally peaceful ang eleksyon sa probinsya sang Capiz.
Nahibaluan nga antes paman ang eleksyon, may mga puwersa na sang militar ang ginpahamtang sa probinsya ilabi na sa may mga presensiya sang rebelde nga grupo.
