Gin-alerto na ni Philippine Army Chief Lt. Gen. Roy Galido ang tropa sini may kaangtanan sa selebrasyon sang ika-56 ka tuig nga pagkatukod sang Communist Party of the Philippines (CPP).
Suno kay Galido, masami nga nakaalerto ang tropa sang Philippine Army batuk sa mga bayolente nga aktibidades sang New People’s Army (NPA) nga amu ang armed wing sang CPP.
Ginpahayag naman ni Philippine Army Spokesman Col. Louie Dema-ala nga ginpanugyanan na sang liderato sang ila nga puwersa ang mga suldado sa frontlines nga mangin alerto kag padayunon ang internal security operations agud siguruhon nga mapatuman ang peace and order sa ila nga mga hurisdiksiyon.
Ginhatagan pagtamod sang opisyal nga importante nga masiguro nga makasaulog sang malinong kag mangin malipayon sa Paskwa ang tagsa ka mga pamilya.
Una na nga ginbuyagyag sang CPP-NPA-NDF nga indi ang mga ini magdeklarar sang ceasefire sa pagsaulog sang kapaskwahan subong nga tuig bangud padayon ang pagpang-atake sang tropa sang militar sa ila nga hanay.
Mangin si Defense Secretary Gilberto Teodoro Jr. ang ginpamatukan man ang pagdeklarar sang unilateral ceasefire sa hanay sang NPA rebels bangud sa rason nga ginahingalitan lamang suno diri sang komunista nga grupo sa paglunsyar sang mga bayolente nga aktibidades.
