ROXAS CITY, CAPIZ- All-set na ang mga katapo sang Philippine Coast Guard (PCG) Capiz para sa pagbantay kag pagsiguro sang kaluwasan sang tagsa ka mga pasahero nga magadaguso sa tion sang tigkalalag subong nga tuig.
Sa interview sang Bombo Radyo kay Senior Chief Petty Officer Arnel O. Nisola, PCG Chief Master-at-Arms sang Coast Guard Station Capiz, iya ginpahayag nga sandig ini sa direktiba ni President Ferdinand Marcos Jr. nga magpatuman sang heightened alert status umpisa Oktubre 30 tubtob Nobyembre 4 para masiguro ang seguridad sang tanan nga mga pasahero, port kag waterways sa bug-os nga pungsod.
Suno kay Nisola, magapahamtang sila sang mga Malasakit Help Desk para sa madasig nga paghatag sang bulig sa mga nagakinahanglan.
Pahayag nya, mas pasangkaron sang PCG ang monitoring kag assistance operations sa mga pantalan samtang magapatigayon man sang istrikto nga inspeksyon ang Coast Guard K9 units sa mga sea vessels kag bagahe agud masiguro ang kaluwasan sang mga pasahero. Maga-deploy man ang ila nga talatapan sang mga personnel sa mga beach resorts kag coastal areas sa Capiz agud masiguro ang kaluwasan sang mga nagabisita kag nagabakasyon sa amo nga panahon.
Nahibaluan nga yara sa 94 tanan ka mga katapo sang Philippine Coast Guard (PCG) Capiz ang iga-deploy kag may yara man sang 11 ka mga deployable response team.
Nagapanawagan man ang PCG-Capiz sa publiko nga magkooperar kag magsunod sa mga ginapatuman nga safety protocols agud malikawan ang anuman nga insidente subong nga tion sang tigkalalag.
Interviewed by Bombo Sunnie Mae Constantino Batencila
