ROXAS CITY, CAPIZ- Naka-red alert status na ang Philippine Coast Guard-Capiz bilang kabahin sang preparasyon sa pagpamahog nga dala sang Bagyo Uwan.
Sa interview sang Bombo Radyo kay Senior Chief Petty Officer Arnel Nisola, Chief Master at Arms sang Philippine Coast Guard-Capiz, iya ginpahayag nga nagpapanaog na ang National Headquarters sang mandato nga ipasaka na sa red alert status ang tagsa ka mga station sang Philippine Coast Guard sa bug-os nga pungsod bangud sang nasambit nga bagyo.
Suno kay Nisola, kasunod sang mandato nagikan sa babaw, naka-alerto naman ang 94 tanan ka mga personnel sang ila nga talatapan sa diin nga nagtukod sila sang 14 ka mga deployable response teams.
Pahayag nya, magluwas sa mga personnel, nakaplastar naman ang tagsa ka mga floating assets kag saving equipments para sa pag-abot sang tion nga may nagakinahanglan sang bulig.
Samtang, padayon ang koordinasayon sang ila nga talatapan sa Provincial Disaster Risk Reduction and Management Office (PDRRMO) kag City Disaster Risk Reduction and Management Office (CDRRMO) para sa dugang nga mga preparasyon.
Suspendido naman ang byahe sang tanan nga sahi sang mga sakayan-pandagat sa kalalawran sang probinsya sang Capiz.
Nahibaluan nga may yara sang syam (9) ka mga tawohan sang pito (7) ka mga rolling cargos ang sa subong na-stranded sa Culasi Port, Barangay Culasi, Roxas City, Capiz.
Nagapanawagan naman ang natungdan sa publiko, ilabi na sa mga manugpangisda nga likawan anay sa subong ang magpalawod bangud sa pamahog nga dala sang Bagyo Uwan agud malikawan ang kun ano man nga sahi sang insidente ang posible nga magluntad sa kalalawran.
Interviewed by Bombo Sunnie Mae Constantino Batencila
