Nagkasa sang search and rescue operations ang Philippine Coast Guard (PCG) para sa 21 ka mga tripulante nga Pinoy sakay sa nagkulob nga cargo vessel M/V Devon Bay nga may karga nga iron ore malapit sa Scarborough ukon Panatag Shoal.
Gindeploy sang Philippine Coast Guard ang duha sini ka mga barko nga amo ang BRP Teresa Magbanua kag BRP Cape San Agustin, subong man ang duha ka eroplano sang Philippine Coast Guard agud pangitaon ang mga tripulante sang cargo vessel.
Base sa inisyal nga report, naghalin sa Gutalac, Zamboanga del Sur ang cargo vessel kag nagabiyahe padulong sa YangJiang, China sang natabo ang insidente.
Ulihi nga nakit-an ang sakayang pandagat malapit sa Sabangan Point, Agno Bay, Pangasinan sang Enero 22 sang gab-i nga yara sa sulod sang exclusive economic zone sang Pilipinas.
Kahapon nga adlaw, nakabaton sang impormasyon ang Philippine Coast Guard Command Center gikan sa Hong Kong Maritime Rescue Coordination Center nga 10 sa 21 ka mga Pinoy crew members ang narescue sang naglabay ang sakayan pandagat sang China Coast Guard.
Apang duha naman ka Pinoy crew members ang napatay samtang isa ang yara sa kritikal nga kondisyon.
Suno kay PCG spokesperson Capt Noemie Cayabyab, padayon ang monitoring sang Coast Guard sa sitwasyon kag nagapabilin nga fully committed sa pagsiguro sang kaluwasan sang iban pa nga mga Pinoy crew members.
