Lusot na sa Bicameral Conference Committee ang landmark measure nga nagadeklarar sa kinamatarong sang pungsod sa maritime zone ukon ang Philippine Maritime Zones Act.
Suno kay Senate Majority Leader Francis Tolentino, nagapanguna nga author kag sponsor sang hagna, ini ang una nga kahigayunan nga pagagamiton kag nakasaad sa isa ka layi nga igapasa sang Kongreso ang termino nga West Philippine Sea.
Pagaislan man ang pangalan sang Philippine Rise sa “Talampas ng Pilipinas”.
Kumpyansa si Tolentino nga maathag na ang kinamatarong sang maritime zone kag klaro ang boundary kun sa diin mahimo nga maglayag kag magpangisda ang mga Pilipino.
Masunod sini nga ratipikahan sang Senado sa pagbalik sesyon ang hagna kag igapasaka ini sa talatapan sang Presidente agud mapirmahan kag mapasalayi.
