Ginlutos sang Philippine men’s football team ang Maldives sa score nga 2-0 para sa 2027 Asian Cup Qualifiers.
Ginpangunahan nanday Jefferson Tabinas kag Sandro Reyes sa kadalag-an nga nag-iskor sang tag-isa ka goal sa first half sa hampang nga ginhiwat sa Male’s National Football Stadium sa Maldives.
Bangud sa kadalag-an, katumbas sila sa standings sang Tajikistan nga may apat ka daug kag isa ka kapierdihan nga may tag-13 points sa Group A.
Maga-atubangay ang duha ka teams sa Marso 2026 agud mahibaluan kon sin-o ang maka-qualify sa 2027 Asian Cup nga pagahiwaton sa Saudi Arabia.
Kinahanglan nga magdaug ang Pilipinas sang tubtob duha ka goals batok sa Tajikistan agud makuha nila ang goal difference.
Madumduman nga ginlutos sang Pilipinas ang Maldives sa score nga 4-1 kag nagtabla sa 2-2 batok sa Tajikistan sadtong Hunyo sang ginhiwat ang duha ka hampang sa New Clark City Stadium sa Tarlac.
Sang nagligad man nga Oktubre, ginlutos sang Pilipinas ang Timor-Leste sa home and away games.
