Ginpaathag sang isa ka legal nga eksperto nga ang pagmimina sa Pilipinas kinahanglan magpatuman sang responsableng benepisyo sa ekonomiya samtang ginaproteheran ang atun nga palibot.
Sa interview sang Bombo Radyo kay Atty. Criselda Heredia sang IBP Capiz Chapter, iya ginpahayag nga ang Republic Act No. 7942 ukon ang Philippine Mining Act of 1995 amo ang nagadumala sa exploration, development, utilization kag conservation sang mineral resources sang pungsod.
Suno kay Heredia, apisar ginatugutan sang layi ang pribado nga sektor nga magpatigayon sang pagmimina, klaro nga ang tanan nga mineral resources sang Pilipinas yara sa pagpanag-iya sang Estado ukon gobyerno. Ang papel sang gobyerno amo ang paghatag sang permit, pagmonitor sang operasyon, kag pagsiguro nga nasunod ang mga environmental kag social safeguards.
Ginpabutyag man sini nga antes makahatag sang mining permit ukon mineral agreement, kinahanglan matuman sang kumpanya ang nagkalain-lain nga requirements lakip na ang environmental compliance, technical capability, financial capacity kag konsultasyon sa mga komunidad nga maapektuhan sang proyekto.
Nagpanawagan man ang natungdan sa publiko ngamangin responsable sa paggamit sang mineral resources kag magbuligay sa para indi makompromiso ang kaayuhan sang masunod nga henerasyon.
