Ginpasiguro sang Philippine Ports Authority (PPA) ang kaluwasan sang mga pasahero nga stranded sa mga pantalan sa tunga sang pagkanselar sang madamo nga biyahe sang mga depasahero nga sakayang pandagat.
Suno kay PPA Spox Eunice Samonte, ang tagsa ka pantalan ang may gin-assign nga mga gwardya nga amo ang magamintinar sang katawhay kag safety sang tagsa ka mga pasahero.
Ginpahayag man sini nga ang port police, kaupod ang mga katapo sang Philippine Coast Guard, ang regular nga nagabantay kag nagapatigayon sang inspeksyon.
Suno kay Samonte, nagalakip man sa pagmentinar sang katawhay ang paghatag sang bastante nga pagkaon sa mga stranded nga pasahero.
Ginpahayag man sini nga nakahatag na sang bastante nga food packs ang Department of Social Welfare and Development ukon DSWD agud ipanagtag sa mga pasahero.
Samtang, madamo man sa mga pantalan nga una nga naka-record sang mga stranded nga pasahero ang nagikan sa Visayas kag Mindanao, ang mga rehiyon nga naka-eksperyensya sang mabaskog nga pag-ulan nga dala sang southwest monsoon.
Bisan sa Southern Luzon area kaangay sang Bicol Region kag Mimaropa Region, may mga na-stranded man umpisa subong nga adlaw.
Suno kay Samonte, padayon nga magabukas ang tagsa ka terminal building para sa shelter sang mga pasahero nga indi na makapauli ukon makapauli samtang nagahulat sang pagbalik sang byahe.
