Sa interview sang Bombo Radyo kay Raymundo Martinez, Chapter Administrator sang Philippine Red Cross-Capiz Chapter, iya ginpahayag nga importante ang regular blood donation drives bangod ang dugo kinahanglanon sa mga pasyente nga nagaagi sa operasyon, mga biktima sang aksidente, mga nagabaton sang emergency treatment kag iban pa nga may seryoso nga medical conditions.
Suno kay Martinez, ang blood donation kinahanglan padayonon agud mangin handa ang mga ospital sa adlaw-adlaw nga panginahanglan kag sa mga emerhensya kag kalamidad.
Pahayag pa niya, ang kwalipikado nga donor ang dapat yara sa edad 16 tubtob 65 anyos, may kabug-aton nga indi magnubo sa 50 kilograms, kag kinahanglan makapahuway sang husto antes magdonate.
Ang proseso halin registration tubtob recovery nagakuha sang average nga 30 minutos, samtang ang aktuwal nga pagkuha sang dugo nagalawig sang mga 5 tubtob 10 minutos. Indi man ini ginakabig nga makapaluya sa donor, kag nagagamit ang sterile kag disposable nga mga dagom kag syringe para mapabilin nga safe ang proseso.
Nagapangabay ang Philippine Red Cross-Capiz Chapter sa mga Capiznon nga mag-upod sa Dugong Bombo 2026 sa Nobyembre 14 agud makabulig sa pagpasiguro sang sapat kag safe nga suplay sang dugo para sa mga nagakinahanglan.
