Nangin bug-os ang pagpanghanda sang Philippine Red Cross- Capiz Chapter sa nag-agi nga bagyo Verbana sa probinsya sang Capiz.
Sa interview sang Bombo Radyo kay Raymundo Martinez, Administrator sang Philippine Red Cross-Capiz Chapter, iya ginpahayag nga gin-deploy ang tanan nga mga katapo sang ila talatapan agud magbantay kag magbulig sa mga nagakinahanglan sa tion sang pagbaskog sang ulan kag hangin nga dala sang bagyo.
Suno kay Martinez,nagpakigbahin man ang mga miyembro sang 143 volunteer team sang Philippine Red Cross- Capiz Chapter nga ginakalakipan sang tanan nga mga volunteer nga nakabase sa nagkalain-lain nga kabanwahanan agud mag-assist kag mag-report sang sitwasyon sang kada lugar.
Samtang, nag-standby man ang food truck sa tion nga kinahanglanon sang pagkaon para sa mga evacuees.
Pahayag pa niya, ang ila nga tikang ang may koordinasyon sa mga local government units kag ban pa nga mga ahensya nga nagpatigayon man sang pre-emptive measures para sa tagsa sini nga mga pumuluyo.
Nagpahanumdom man ang natungdan sa publiko nga magpamati kag magsunod sa mandu sang local government officials kag Disaster Risk Reduction and Management Offices bangud sila ang mas nakahibalo sang tama nga hilikuton sa oras sang kalamidad.
