Naka-heightened alert sa gihapon ang Philippine Red Cross (PRC) matapos ang gulpi nga pagtaas sang aktibidad sang Bulkan Mayon kahapon nga adlaw.
Suno sa report, takna alas 4:28 sang hapon sang nagluntad ang lava collapse nga nagtuga sang rockfalls kag ashfall sa malapit nga mga lugar.
Ginsundan ini sang Strombolian activity sang alas 4:50 sang hapon.
Kadungan sini, naka-standby man ang Red Cross 143 volunteers sa Camalig, Guinobatan, Legazpi City, kag Daraga agud maghatag sang real-time nga dokumentasyon kag updates sa operations center.
Padayon man ang koordinasyon sang Philippine Red Cross sa mga lokal nga otoridad kag disaster response agencies para masiguro ang kaluwasan sang mga pumuluyo sa Bicol.
Ginpaandaman man sang Philippine Red Cross ang mga komunidad nga indi magsulod sa danger zones, ilabi na sa mga river channels kag gullies nga mahimo mag-agi sa madasig nga pag-ilig sang mainit nga gas kag debris.
Ginapanugyanan man ang mga pumuluyo nga magpabilin sa sulod sang balay kon may ashfall, maggamit sang protective mask, kag siguraduhon nga may tabon ang pagkaon kag tubig agud malikawan ang kontaminasyon.
