ROXAS CITY – Bilang kabahin sang fundraising effort sang Philippine Red Cross (PRC) Capiz Chapter, ginlunsyar ang Adopt PULA-the giving bear nga may katuyuan maghatag sang bulig kag assistance sa mga indibidwal nga apektado sang kalamidad sa pungsod.
Ginpahayag ni Mr. Ray Martinez, PRC-Capiz administrator, sa pag-adoptar kay PULA pinaagi sa P799 nga kantidad may isa na ka pamilya na nga mabuligan sa sulod sang tatlo tobtob lima ka adlaw.
Suno kay Martinez nga pinaagi sini makatipon sang pondo ang PRC nga ila magamit sa pagbulig sa mga pamilya sa disaster stricken areas.
Kun duha ka PULA bear ang adoptahon, may dugang nga hygiene kit pa nga mabaton ang pila ka pamilya nga makabaton sang bulig.
Nahibaluan nga wala sang regular budget nga ginabaton ang PRC nga nagaserbe nga auxillary sang gobyerno nga nagabulig sa mga disaster affected areas.
Agud makatipon sang pondo nga ila gamiton sa pagbulig, nagapatigayon sang fund raising effort ang ahensiya nga suportado sang pila ka ahensiya sang gobyerno, pribado nga organisasyon kag NGO’s.
