ROXAS CITY – Ginwasak sang Philippine Track and Field Athletic ang 37 ka tuig nga record matapos ang ginpatigayon nga 2023 Asian Athletic Championships nga ginhiwat sa Suphachalasai National Stadium sa Bangkok Thailand nga nagsugod sadtong Hulyo 12 tubtob 16 subong nga tuig.
Sa interview sang Bombo Rdayo kay Mr. Joyme Sequita isa sa mga atleta nga nagpakigabahin sa amu nga hinampang, wala nila ginalauman nga mawasak ang kapin 37 na ka tuig nga record sa Asian Athletic Championships.
Apisar nga wala naswertehan nga madala ang ila hubon sa Top 3, tuman sa gihapon ang ila kalipay bangud isa ini ka oputunidad nga magabukas sa ila sa pagpadayon sang ila karera sa patag sang hinampang.
Mahibaluan nga yara sa Top 6 ang hubon nanday Sequita kun sa diin nagpanguna sa amu nga pa-indis-indis ang atleta sang pungsod Sri Lanka, ginsundan ini sang India.
Suno diri yara sa 44 tanan nga mga pungsod ang nagpasakop sa amu nga hinampang kag maswerte ang hubon sang Pilipinas nga isa sa nalakip diri.
Ginpahayag man sini nga gintinguhaan gid nila sang iya grupo nga malab-ot ang handum sang ila coach kun sa diin wala ini napaslawan kag nagasalig nga mas masarangan pa nila nga mapanubo ang oras nga ila nakuha.
Masunod naman nga ginapreparahan nanday Sequita ang Japan Open Championship kun sa diin sunod nila nga makasambuwa ang nagkalain-lain nga mga pungsod.
Pangabay sini sa tanan nga suportahan ang ila hubon kag bantayan ang ila nga hampang.
