Napaslawan ang Philippine women’s football team sa ila ikaduha nga hampang sa 2026 AFC Women’s Asian Cup matapos napierde sang South Korea sa iskor nga 0-3, sa Gold Coast Stadium.
Ini matapos nga nadomina sang South Korea ang torneo sang nakaiskor si Jeon Yu-Gyeong sa sulod sang 12 minutes, gamit ang left-footed shot nga gin-assist ni Kim Shin-Jin.
Makaligad ang tatlo ka minutos, nagdoble ang bentaha sang Korean team pinaagi sa goal ni Park Seo-Jeong gikan sa assist ni Choo Hyo-Joo.
Nagtinguha nga makabawi si Carleigh Frilles sang Pilipinas, apang nasaho ini sang goalkeeper nga si Kim Min-Jung.
Nagpakita man sang mabaskog nga depensa ang goalkeeper nga si Olivia McDaniel matapos mapauntat ang pila ka shots sang South Korea lakip na ang kay Son Hwa-Yeon sa 55 minutes.
Apang, ginselyohan sang ulihi ni Mun Eun-Ju ang kadalag-an para sa South Korea sang naka-iskor siya sa 55 minutes pinaagi sa isa ka right-footed shot.
Bangud sa kapierdihan, nagnubo sa katapusan nga ranking sang Group A ang team sang Pilipinas matapos nga napierde man sila sang Australia, sa iskor nga 0-1, sa ila una nga hampang.
