Nagpaandam ang Philippine Space Agency (PhilSA) sa publiko sa posibilidad nga pagkahulog sang debris sang Long March 4B rocket sang China sa mga kadagatan nga sakop sang Pilipinas.
Sang tinalikdan nga Martes sang ginlunsyar sang China ang nasambit nga rocket gikan sa Xichang Satellite Launch Center sa Liangshan Yi Autonomous Prefecture, Sichuan.
Suno sa PhilSA, posible nga mahulog ang nasambit nga rocket sa natumod nga drop zones nga yara sa 243 nautical miles (NM) gikan sa Philippine Rise, nga yara sa sidlangan nga bahin sang northern coastline sang Dinapigue, Isabela, kag 318 NM gikan sa Panay Island, northwest sang Catanduanes.
Ginapahalong ang mga nagabyahe nga mga barko, baruto kag mga salakyan nga pangkahanginan sa nasambit nga mga drop zone bangud sa banta nga pagkahulog sang debris.
Ginganyat naman sang PhilSA ang publiko nga ipahibalo sa mga lokal nga otoridad kun may nakita nga makaduluda nga debris sang rocket.
Sa gin-isyu nga memorandum naman sang NDRRMC, gin-abisuhan sini ang Philippine Coast Guard, Bureau of Fisheries and Aquatic Resources, kag Department of Environment and Natural Resources-National Mapping and Resource Information Authority nga ikonsiderar ang pagpatuman sang temporaryo nga restriksiyon sa natumod nga drop zones.
