Ginpaandam sang Philippine Institute of Volcanology and Seismology (Phivolcs) ang posibilidad sang pag-ilig sang lahar gikan sa Mayon Volcano bangud sa asud-asod nga mga pag-inulan tuga sang shearline.
Suno sa ahensiya, mahimo nga anuron sang asud-asod nga pag-inulan ang lahar ukon volcanic sediments nga magailig sa mga channel sa balisbisan sang bulkan Mayon.
Mahimo man nga magresulta ini sang madamo nga lutak sa agos sang tubig sa mga sapa, kag mangin pamahog sa mga malapit nga komunidad nga yara sa middle kag lower slope sang Mayon volcano.
Kalakip sa mga posible nga maapektuhan diri amu ang Miisi, Binaan, Anoling, Quirangay, Maninila, Masarawag, Muladbucad, Nasisi, Mabinit, Matan-ag, Basud, kag Bulawan Channel sa Albay.
Bangud sini, ginahaylo sang ahensiya ang mga LGUs sa mga nasambit nga lugar nga mag-obserbar kag maghimo sang mga pre-emptive response para sa kaluwasan sang mga residente nga maapektuhan sang nasambit nga lahar flow.
