Nagpaandam ang Philippine Institute of Volcanology and Seismology (Phivolcs) sa madugay nga pagkalantad sa asupre nga ginabuga sang bulkan Kanlaon.
Ini ang matapos nga magbuga ang Kanlaon sang kabug-usan nga 5,177 tonelada sang sulfur dioxide sang Dominggo, Nobyembre 3.
Suno sa ahensiya, posible nga magtuga sang iritasyon sa mata, tulun-an kag respiratory tract ang aso. Nagpaandam man ang Phivolcs sa mga indibidwal nga may health conditions kasubong sang asthma, sa nagabusong kag bata nga sensitibo sa mga aso ukon sungaw gikan sa bulkan.
Samtang, nagbuga man ang bulkan sang madakmol nga plume nga nagdangat sa 350 metros ang taas nga nagtugpa sa timog-kanluran nga direksiyon. Nagapabilin naman nga nagamaga ang edipisyo sang bulkan.
Nakabalhag man sang 5 ka pagtay-og sa bulkan sa nakaligad nga 24 oras.
Sa karon, nagapabilin nga yara sa Alert level 2 ang Kanlaon bangud sa increased unrest kasunod sang nabalhag nga paglupok sang Hunyo subong nga tuig.
